БШКнын төрайымы депутатка: "Биз мыйзамды аткарып жатабыз, үйрөтпөсөңүздөр"

Бүгүн, 19-майда Жогорку Кеңештин комитет жыйынында парламентке өтүү үчүн босоголук чекти 5 пайызга төмөндөтүү мыйзам долбоору каралып жатат.

Депутат Кенжебек Бокоев Борбордук шайлоо комиссиясынын төрайымы Нуржан Шайлдабековага кайрылды. "7 пайыздык босого чегин колдойбуз деп айтып кеттиңиз. Мурун өзүңүздүн сүйлөгөн сөзүңүздө жол-жоболорду өзгөртпөй туруп шайлоого барабыз деп айттыңыз эле", - деди депутат.

Нуржан Шайлдабекова: "Кенжебек Сатымкуловичке, Исхак Абсаматовичке (ред. Исхак Масалиев) кайрылып кетет элем, менин сөздөрүмдү каалагандай чечмелебеңиздер. Биз сиздерге мурда киргизилген мыйзамдар кандай таасир этти деген анализди толугу менен жасап бердик. Чечим кабыл алуу сиздердин укугуңуздар", - деди.

Бокоев: "Сиз элдин астында мыйзамга өзгөртүү киргизбестен, келерки шайлоого ушул систем менен барабыз деп айтпашыңыз керек. Сиздер мыйзамдарды так аткаруу менен шайлоолорду өткөрөбүз деп айтышыңыздар зарыл", - деди.

Шайлдабекова: "Биз мыйзамды аткарып жатабыз, үйрөтпөсөңүздөр", - деп жооп берди.

Автор: Жылдыз Джускембаева