Депутат Марлен Маматалиев: "Парламентке өтүү үчүн босого чеги 9 пайыз бойдон калып калбасын деп, 7 пайыздык босого чек тууралуу долбоор өтүп кетти". КҮНСОБОЛ

Бүгүн, 19-майда парламенттин комитетинде Жогорку Кеңешке саясий партиялардын өтүшү үчүн шайлоо босого чегин 9 пайыздан 5 пайызга төмөндөтүү мыйзам долбоору каралып, четке кагылды.

Буга чейин 20-февралда президент Сооронбай Жээнбеков Жогорку Кеңештин жыйынында партиялардын парламентке өтүү босого чегин 9 пайыз кылууга саясий күчтөр даяр эместигин айткан. 5 жана 3 пайызды айткандар да болуп жатканын билдирип, алар "жаштарга мүмкүнчүлүк берели" деген менен өз камылгасын көрүп жатышканын белгилеген. Ал эми 7 пайыз бул басып өткөн, сыноодон өткөн жол экенин билдирген.

Өткөн аптада Жогорку Кеңеште босого чегин 7 пайызга төмөндөтүү боюнча мыйзам долбоорун биринчи окууда жактырылган.

SUPER.KG порталы "Парламентке өтүү үчүн босоголук чекти 5 пайызга түшүрүү комитеттен колдоо тапкан жок. Депутаттар элдин өкүлү болуу миссиясын туура аткарып жатышабы?" деген собол салды.

Депутат Марлен Маматалиев 5 пайыздык, 7 пайыздык босого чегин колдой турганын айтты.

"Босого чегин 5 пайызга түшүрүп койгондо элдин өкүлү болуу миссиясын аткарды дегенден алысыраак болот элем. Маселе 5 пайыз же 7 пайызда эмес. Маселе босого чегин 9 пайыздан түшүрүү болчу. Турмушка өтө маанилүү өзгөртүү киргизип жатканда сөзсүз түрдө президенттин да пикирин эске албай коюуга болбойт. Босого чеги 9 пайыз бойдон калып калбасын деп, 7 пайыздык босого чек тууралуу долбоор өтүп кетти.

Мен өзүм 5 пайыздык, 7 пайыздык босого чегине макулмун. Бирок 3 пайыздык босого чегине каршымын. Анткени 3 пайыз болгондо регионалдык партиялардын келишине жол түзүлүп калмак. 60 миң добуш алуу Кара-Суу районуна же бир облуска маселе эмес. Бир облустук партиялардын же диний уюмдардын келишине шарт түзүлүп калат эле. Көп партиялар парламентке келсе, ыдырап өкмөт жакшы иштебей калат. Өкмөт жылына бир жолу эмес, эки жолу кетет.

5 пайыз менен 7 пайыздын ортосунда көп деле айырма жок. Депутаттардын арасында босого чегин 9 пайыз бойдон калтыруу күчтөр бар эле", - дейт Маматалиев.

Автор: Жылдыз Джускембаева