Баткендеги жугуштуу оорулар ооруканасын оңдоп түзөө жумуштары аяктап калды

Баткендеги жугуштуу оорулар ооруканасынын имаратын оңдоп түзөө жумуштары 70 пайызга аяктады. Бул тууралуу өкмөттүн Баткен облусундагы ыйгарым укуктуу өкүлүнүн басма сөз кызматынан кабарлады.

Маалыматка ылайык, Баткен облустук үй-бүлөлүк дарыгелер борборунун эски имаратын, 90 орундуу ооруканага ыңгайлаштыруу максатында жасалып жаткан оңдоп-түзөө иштери 70 пайызга аяктаган.

"Учурда имараттын эшик терезелери, чатыры толугу менен алмаштырылып, канализация жумуштары бүткөрүлдү. Оңдоп-түзөө жумуштарына республикалык бюджеттин эсебинен 12 миллион сомдон ашуун каражат бөлүнгөн. Оорукана август айынын аягына пайдаланууга берилүүсү күтүлүүдө", - деп билдирди басма сөз өкүлү.

Белгилей кетсек, бүгүнкү күнгө чейин Баткен районунун жана Баткен шаарынын 120 миңге чукул калкына, облустук оорукананын 45 орундуу жугуштуу оорулар бөлүмү кызмат көрсөтүп келет.

Автор: Гүлшат Ысамамат кызы