Өз кызынан ажал тапкан апа: Алайда апасынын өлүмүнө айыпталган кыз сот залынан бошотулду

Ош облусунун Алай районунда апасынын өлүмүнө шектелген 16 жаштагы кыздын иши өндүрүштөн кыскартылды. Бул тууралуу SUPER.KG порталына Ош ОИИБинин басма сөз кызматынан билдиришти.

Маалыматка ылайык, чечимди Алай райондук соту 14-октябрда чыгарган.

"Айыпталуучу С.к.А. Жазык кодексинин 131-беренесинин 1-бөлүмү "аффект абалында киши өлтүрүү" менен күнөөлүү деп табылып, Жазык кодексинин 60-беренесинин "Кодекстин өзгөчө бөлүгүнүн жоболорунун негизинде жазык жоопкерчилигинен бошотуу" менен иши өндүрүштөн кыскартылган. Тактап айтканда, сот залынан токтоосуз бошотулган".

Маалымат катчы кыздын иши өндүрүштөн кыскартылганын төмөнкүчө түшүндүрдү.

"Айыпталуучу кыз кылмыш ишин жасаганда 16 жашка толо элек болгон. Жазык кодексте 16 жашка чыга элек өспүрүм кылмыш кылса, жоопкерчилик тартпай турганы жазылган. Кыз тергөөдө күнөөнү жарым жартылай моюнга алган. Тактап айтканда, аффект абалында болгон. Себеби апасы ичимдик ичкен, ошол күнү да ичип келип, кызын сабаган. Ошондо ал кулпу менен апасын чаап жиберген. Эртең менен туруп караса эле апасы каза болуп калган", - деп билдиришти басма сөз кызматынан.

Окуянын чоо-жайы:

25-апрель күнү саат 10:00 чамасында Алай районунун Жошолу айыл аймагындагы айылдардын биринде 52 жаштагы аялдын жансыз денеси табылгандыгы тууралуу маалымат Алай РИИБинин нөөмөт бөлүмүнө келип түшкөн. Ыкчам тергөө тобу окуя болгон жерге барып, төмөндөгүлөрдү аныктаган. 24-апрель күнү саат 22:00 чамасында 16 жаштагы кыз апасы менен уруша кетип, эшикке илинүүчү темир кулпу менен апасынын башына 2-3 жолу уруп, башка бөлмөгө кирип жатып алган. Жаракат алган 52 жаштагы апасы кансырап жаткан жеринде каза болуп калган. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Ал эми кылмышка шектүү катары маркумдун кызы кармалып, 2 айга камакка алынган.

Автор: Айсалкын Качкынбекова