1 жарым миллион сомго чукул каражатты уурдоого жана башка кылмыштарга тиешеси бар делинген жарандар Бишкектен кармалды

Бишкекте тоноочулукка, башка бирөөнүн мүлкүн уурдоого байланыштуу бир катар кылмыштарга катышкан топтун мүчөлөрү кармалды.

Чүй ОИИБинин маалыматына ылайык, 21-октябрда Ысык-Ата РИИБинин нөөмөт бөлүмүнө Кант шаарынын көчөлөрүнүн бириндеги тоноо фактысы боюнча билдирүү келип түшкөн. Айтылган дарекке милиция кызматкерлери барып, окуя саат 03:00 чамасында коммерциялык банктардын биринде болгонун аныкташкан. Анда бет кап кийген үч белгисиз жаран банкка кирип, 1964-жылы туулган күзөтчү М.Г`га күч колдонуп, банкоматты ачып 1 миллион 400 миң сомдон ашык суммадагы накталай акчаны алып, белгисиз тарапка качып кетишкен.

Жогорудагы факты Кылмыштардын жана жоруктардын бирдиктүү реестрине 202-берене ("каракчылык") менен катталып, сотко чейинки өндүрүш иши ачылган.

"Ыкчам тергөө амалдарынын жүрүшүндө шектүүлөр 35 жаштагы О.У., 28 жаштагы А.А. жана 21 жаштагы А.А. экени аныкталды. Алар бир нече күндөн кийин Бишкек шаарынан кармалды. Кармалган жарандар бул кылмыш боюнча, ошондой эле Ысык-Ата районунун аймагындагы бирөөнүн мүлкүн уурдоо менен байланышкан бир катар кылмыштарга катыштыгы бар экенин моюнуна алышкан. Учурда тергөө амалдары улантылып жатат", - деп билдиришти мекемеден.

Автор: Бактыгүл Момбекова