Темирлан Султанбеков: "БШК уруксат берсе "баарына каршы" деген графа менен президенттикке талапкерлигимди коём"

"Социал-демократтар" партиясынын мүчөсү Темирлан Султанбеков алдыда өтө турчу президенттик шайлоого катышуу үчүн БШКга арыз менен кайрылат. Бул тууралуу ал бүгүн, 12-ноябрда социалдык тармактагы баракчасына жазып чыкты.

Анда Темирлан Султанбеков президенттикке талапкер болууга жашы жетпесе дагы БШКга "баарына каршы" деген графаны ага берүү үчүн кайрылып көрөрүн билдирген.

"Кыргыз өлкөсүнүн конституциясы боюнча президенттикке жашы 35тен өйдө жарандар талапкер боло алат. Мен 22 гана жаштамын.

Бүгүн мен БШКга арыз берген талапкерлердин тизмесин карап көрдүм. Тилекке каршы, арасынан күчтүү, эрктүү, максаттуу талапкерлерди көрө алган жокмун.

Эртең мен БШКга расмий түрдө мени "баарына каршы" деген графага бекитүү боюнча кайрылам. Мен шайлоо күрөөсүн төлөөгө даярмын. Ал эми 30 миң колду 1 айда эмес, 1 суткада эле топтоп коёбуз.

Эгер БШК макул болсо "баарына каршы" деген чоң команда түзөбүз. "Баарына каршы" графасы жеңсе чыныгы люстрацияны жүргүзүүгө жана президенттин басымы жок конституциялык реформаны жасоого мүмкүнчүлүк болот.

А эгер БШК баш тартса талапкерлердин кемчиликтери же оң жактарына жараша кимге добуш берүү керектигин карап көрөбүз", - деп жазылган билдирүүдө.

Автор: Бактыгүл Султаналиева