Чүйдө жалпы суммасы 35 миң сомду түзгөн тамекилерди уурдаганга шектелген жаран кармалды

Чүй облусунда жалпы суммасы 35 миң сомду түзгөн тамекилерди уурдаганга шектелген жаран кармалды. Бул тууралуу бүгүн, 2-декабрда Чүй ОИИББинин басма сөз кызматынан кабарлашты.

Белгилүү болгондой, ушул жылдын февраль айында Москва РИИБине Александровка айылынын 30 жаштагы тургуну арыз менен кайрылган.

"Арыздануучу азык-түлүк саткан дүкөнүнүн эшигин талкалоо жолу менен кирип, тамекилерди жана 1500 сомду уурдап кеткен жаранга карата чара көрүүнү өтүнгөн. Уурдалган тамекилердин жалпы суммасы 35 миң сомду түзөрү көрсөтүлгөн. Бул факт Кылмыштардын жана жоруктардын бирдиктүү реестрине 200-берене (уурулук) менен катталып, сотко чейинки өндүрүш иши ачылган.

Издөө, тергөө иштеринин алкагында шектүү делинген жаран 30-ноябрда кармалды. Шектүү 1993-жылы туулган О.Н. экени жана ал Сокулук районунун аймагында жашай турганы белгилүү болду. Учурда сотко чейинки тергөө иштери улантылып жатат", - дешти мекемеден.

Автор: Бактыгүл Момбекова