"Карызга алган унаалардын акчасын төлөбөй жүргөн". Бишкекте алдамчылыкка шектелген жаран кармалды

Милиция кызматкерлери Бишкек шаарында унаалар менен алдамчылык кылып жүргөн деп шектелген жаранды кармады. Бул тууралуу Октябрь РИИБинин маалымат кызматынан билдиришти.

Ага ылайык, 16-ноябрда Октябрь РИИБине М.Ш. аттуу жаран арыз менен кайрылган. Анда февраль айында Чолпон-Ата көчөсүндө О.Ж. аттуу жаран арыз ээсинин ишенимине кирип, алдамчылык жол менен бөлүп-бөлүп сатып алууну убадалап, жалпы баасы 28 миң доллар түзгөн Toyota Highlander жана Honda CRV үлгүсүндөгү унаасын 7 миң 500 долларын гана төлөп, калганын бербей из жашырып кеткен.

"Кийинчерээк унаалар үчүнчү жактарга сатылып, каражат алардын жеке муктаждыктарына жумшалганы белгилүү болду. Бул факты Кылмыштардын жана жоруктардын бирдиктүү реестрине "алдамчылык" менен катталып, сотко чейинки өндүрүшкө алынган. Издөө иш-чараларынын жүрүшүндө милиция кызматкерлери тарабынан 37 жаштагы О.Ж. кармалып, тергөө кызматына жеткирилди", - деп жазылат маалыматта.

Учурда тергөө иштери улантылууда.

Автор: Гүлзина Каныбекова