"Factcheck" сайтынын редакторунун ур-токмокко алынышы. Сот өкүм чыгарды

Бүгүн, 30-декабрда "Factcheck" сайтынын редактору Болот Темировдун белгисиз адамдар тарабынан ур-токмокко алынышы боюнча Биринчи Май райондук соту өкүм чыгарды. Бул тууралуу аталган соттун басма сөз кызматынан SUPER.KG порталына билдиришти.

"Бишкек шаарынын Биринчи Май райондук сотунун 30-декабрындагы өкүмүнө ылайык, айыпталуучулар А.О. , А.Б. ,Э.Ж. жана Д.Б. күнөөлүү деп табылып, 50 миң сом айып пул салуу менен 2 жыл 6 айга эркинен ажыратылышты.

Ошондой эле айыпталуучулар буга чейин колдонулуп келген мунапыстын негизинде белгиленген жазадан бошотулушкан", - деп жазылат маалыматта.

Ал эми жабырлануучу Болот Темиров соттолуучуларга карата тосмо арыз жазып бергенин, койгон талаптарынан баш тартканын билдирди.

Эске салсак, буга чейин 9-январда белгисиз адамдар журналист Болот Темировду ур-токмокко алып, күч колдонуу менен уюлдук телефонун тартып алышып, из жашырып качып кеткендиги маалымдалган. Бул факты Кылмыштардын жана жоруктардын бирдиктүү реестрине катталып, окуяны ИИМ өз көзөмөлүнө алган.

Автор: Гүлзина Каныбекова