"Самат ава дечи, ава дечи". Актёр Самат Эркинбеков шайлоо күнү кезектеги тамашасын тартуулады

Актёр, алып баруучу Самат Эркинбеков буга чейин иш-чарада президенттикке талапкер Садыр Жапаровду туураган видеосун жарыялаган. Тамашалуу видео интернетке тарагандан кийин талапкердин тарапташтары асылып жатканын актёр айтып чыккан.

Бүгүн, 10-январда Самат мырза Садыр Жапаровдун жардамчылары жана тарапташтары менен жолукту. Бул тууралуу өзү билдирип чыкты.

"Мурдагы күнү пародия кылган талапкердин жардамчылары менен жолуктум, эч кандай коркутуу жана кысым болгон жок. Тамашамды керек болсо тарапташтар сопсонун эле кабыл алышты. Тескерисинче, күлүп, позитив менен сөз башталды. Чыгармачылыгыма ийгилик каалоо менен сөз бүттү. Ошондуктан ыплас сөздөрдү жазганды токтотсок. Себеби Саматиктин комментарийин кичинекей балдар жана алардын чоң апалары окуйт. Мен кимди колдоп жатканымды сопсонун эле билип турасыздар го", - деди ал.

Жогорудагы билдирүүдөн кийин Самат Эркинбеков жаңы тамашасын интернетке жарыялады. Анда актёрго байке деп кайрылган жигитке Самат мырза "ава дечи" дегенин көрүүгө болот.

Автор: Бактыгүл Момбекова