Чүйдө бир нече жолу мал уурдоого шектелгендер кармалды

Чүй облусунун Сокулук районунда мал урдоого шектелген жарандар колго түшүрүлдү. Бул тууралуу Чүй ОИИББинин басма сөз кызматынан билдиришти.

Маалыматка ылайык, Сокулук РИИБине 38 жаштагы Э.Т. арыз менен кайрылып, 2020-жылдын 19-декабрына караган түнү Чат-Көл айылында жайгашкан сарайынан белгисиз бирөөлөр үч баш майда мал жандыктарын уурдап кеткенин билдирген.

Бул факты Кылмыштардын жана жоруктардын бирдиктүү реестрине 200-берене "уурдоо" менен катталып, сотко чейинки өндүрүшкө алынган.

"Издөө иш-чаралардын жүрүшүндө Жалал-Абад облусунда туулуп өскөн 40 жаштагы О.Ы., 28 жаштагы У.Н. жана 23 жаштагы Ж.К. аттуу жарандар кармалып, убактылуу кармоочу жайга киргизилген. Тергөө иштеринде кармалган жарандар Сокулук жана Аламүдүн райондорунан мал уурулугуна байланыштуу дагы 5 фактыга тиешеси бар экендиги аныкталган. Ал эми акыркы уурдалган мал жандыктар ээсине кайтарылып берилди", - деп жазылат маалыматта.

Учурда сотко чейинки өндүрүш иштери улантылууда.

Автор: Гүлзина Каныбекова