Караколдо катуу ылдамдыкта келе жаткан унаа көпүрөдөн сууга кулап кетти

Кечээ, 28-январда Каракол шаарында катуу ылдамдыкта келе жаткан унаа көпүрөдөн кулап кетти. Бул тууралуу Өзгөчө кырдаалдар министрлигинин маалымат кызматынан билдиришти.

Маалыматка ылайык, саат 16:10 чамасында Каракол-Түп унаа жолунун 13-чакырымында “Volkswagen Golf-2” үлгүсүндөгү жеңил унаанын айдоочусу рулга ээ боло албай Жыргалаң суусуна түшүп кеткен.

"Кырсыктын кесепетинен унаанын айдоочусу жабыркаган. ӨКМдин №15 өрткө каршы куткаруу бөлүгүнүн куткаруучулары жеткенге чейин унаанын айдоочусу жолдон өтүп бара жаткан жарандардын жардамында Ысык-Көл облустук ооруканага жеткирилген. Жабырлануучунун аты-жөнү такталууда", - деп жазылат маалыматта.