"Манас" аэропортунан 53 миллион сомдук зер буюмдарды алып өтүүгө аракет кылган жаран кармалды (фото)

Өлкө аймагында зергерчилик буюмдарды контрабандалык жол менен алып өтүү фактысы аныкталды. Бул тууралуу Улуттук коопсуздук боюнча мамлекеттик комитетинен билдиришти.

Билдирүүгө ылайык, кечээ, 9-февралда УКМКнын Коррупцияга каршы күрөшүү кызматынын кызматкерлери "Манас" эл аралык аэропортуна аба каттамы аркылуу чет өлкөдөн келип, бажы аймагынан тийиштүү бажылык каттоосуз өтүүгө аракет кылып жаткан жеринен 1981-жылы туулган Т.Л. аттуу жаран кармалды.

Жүктөрдү текшерүү учурунда жалпы салмагы 17 килограммдан ашык, баасы 53 миллион сомду түзгөн алтын буюмдар табылды.

Учурда сотко чейинки өндүрүш иш-чаралары жүргүзүлүп жатат.

Автор: Айжанар Рыспек кызы