Ноокатта жаранды опузалап коркутуп, акча талап кылган шектүүлөр кармалды. Анын бири уюшкан кылмыштуу топтун мүчөсү

Ош облусуна караштуу Ноокат районунда опузалап акча талап кылган эки жаран кармалды. Бул тууралуу Ош ОИИБинин басма сөз кызматынан билдиришти.

Маалыматка ылайык, 8-февраль күнү Ноокат районунун Гулистан айыл аймагынын Беш-Коргон айылынын 1979-жылы туулган тургуну А.Р. арыз менен кайрылган. Анда арыз ээсин эки жаран коркутуп, 40 миң сом акча талап кылган.

Бул факты Кылмыштардын жана жоруктардын бирдиктүү реестрине 203-берене "опузалап талап кылуу, алдын ала сүйлөшүү боюнча адамдардын тобу менен" катталып, сотко чейинки өндүрүш иши башталган.

"Иликтөө иш-чараларынын жүрүшүндө жогорудагы 2 жаран 14 миң сом акча алып жаткан жеринен кармалып, тергөө кызматына өткөрүлүп берилген. Кармалган шектүүнүн бири Ноокат районунун Көк-Бел айылынын тургуну, ал уюшкан кылмыштуу мүчөсү катары ИИМдин каттоосунда турат. Ал 2014-жылы декабрь айында каракчылык фактысы менен кармалып, Ош облустук соту тарабынан 9 жылга эркинен ажыратылган. 2019-жылы октябрь айында Ош шаарындагы №42 түзөтүү мекемесинде 3 жылдык эркинен ажыратылып ошол жерде мөөнөтүн өтөп жаткан. Ал эми экинчи шектүү Ноокат районунун Чечме-Сай айылынын 33 жаштагы И.М. аттуу тургуну. Ал 2020-жылдын декабрь айында "баңгизат каражаттарын, психотроптук заттарды, алардын аналогдорун сатып өткөрүү максатында мыйзамсыз даярдоо" беренеси менен Ош шаардык соту тарабынан соттолуп, 2 жылга пробациялык мөөнөтүн өтөп жаткан", - деп жазылат маалыматта.