"Москвага жеткирем деп акчасын алган". Бишкекте алдамчылыкка шектүү жаран кармалды

Москва шаарына жеткирем деп 14 миң сом өлчөмүндөгү каражатты алдамчылык жолу менен алып алганга шектүү жаран кармалды. Бул тууралуу Ленин райондук ички иштер башкармалыгынан билдиришти.

"11-февраль күнү Т.Н. аттуу жаран анын чала тааныш адамына карата чара көрүү өтүнүчү менен кайрылган. Анда ошол эле күнү саат 12:00 чамасында Токтогул жана Жаш Гвардия бульварынын кесилишинен таанышы алдамчылык жол менен ишенимге кирип, Т.Н.ны автоунаасы менен Москва шаарына жеткирем деп 14 миң сом өлчөмүндөгү каражатын алып, убадасын аткарбай жүргөндүгүн билдирген", - деп жазылат билдирүүдө.

Издөө иш-чараларынын жүрүшүндө шектүү катары 1991-жылы туулган К.К. аттуу жаран кармалган. Мындан тышкары шектүүнүн үстүнөн дагы 2 арыз келип түшкөн. Учурда шектүү убактылуу кармоочу жайга киргизилди.

Жогорудагы адамдан жапа чеккендер болсо төмөнкү телефондорго кайрылса болот:

0 (312) 352-605, 0 (312) 352-947, 0 (705) 109-102, 0 (990) ) 102 413 жана 102.

Автор: Азат Бейшенбеков