Чачташып, тепкилешип... Мушташып жаткан видеосу тараган 13, 14 жаштагы кыздар боюнча тергөө жүрүүдө

Ленин РИИБи массалык маалымат каражаттарына жарыяланган "кыздардын массалык мушташы" аттуу видеонун чоо-жайын түшүндүрдү.

Маалыматка ылайык, окуя кечээ, 9-мартта окуучу кыздардын ортосунда Фучик көчөсүндө болгон. Ал эми бул факты боюнча "102" кызматына эч кандай билдирүү келип түшкөн эмес.

Бул факты Кылмыштардын жана жоруктардын бирдиктүү реестрине 266-берене "бейбаштык" боюнча катталып, сотко чейинки өндүрүшкө алынган.

"Иликтөө иштеринин жүрүшүндө аталган жаңжалга тиешеси бар бардык окуучулар белгилүү болгон. Алар 2007-2008-жылы туулган. Кыздар кармалып, иштин бардык жагдайларын ар тараптуу тактоо үчүн Ленин РИИБинин тергөө кызматына жеткирилген. Учурда зарыл болгон тергөө иш-аракеттери улантылууда, жыйынтыгы боюнча кошумча маалымат берилет", - деп билдиришти Ленин РИИБинин маалымат кызматынан.

Эске салсак, буга чейин интернетке өспүрүм кыздардын мушташып жаткан видеосу тараган. Анда кыздар бири-бири менен чачташып, тепкилеп, мушташып жатканын көрүүгө болот.