Мык жутуп алган. Бишкекте ооруканадан качып кеткен шектүү боюнча милиция окуянын чоо-жайын айтты

Сүрөт Oppa_kg сайтынан алынды

Бишкектеги ооруканадан качып кеткен кылмышка шектүү боюнча Октябрь РИИБинин басма сөз кызматынан маалымат таратышты.

Билдирүүгө ылайык, качып кеткен шектүү 26 жаштагы Ж.Б. аттуу жаран.

2020-жылдын 17-июль күнү Бишкек шаарынын тургуну арыз менен кайрылып, 12-июлда Көк-Жар кичи районундагы үйүнөн үй эмеректери жана башка буюмдары уурдалганын айтып, арызданган. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

"Милиция шектүүнүн аты-жөнүн тактап, ал 1995-жылы туулган Ж.Б. аттуу жаран экенин аныктаган. Ушул жылдын 27-февраль күнү кызматкерлер аны Ысык-Көл облусунан кармап, Бишкекке алып келишкен. Ал СИЗО-1ге 27-апрелге чейин камакка алынган. 17-март күнү Мамакеев атындагы хирургиялык борборго жаткырылган. Себеби ал кармоо учурунда мык жутуп алган. Аны Октябрь РИИБинин кызматкерлери кайтарып жатышкан. Кечээ, 30-март күнү саат 13:50 чамасында шектүү качып кеткен. Бишкекке "Перехват" планы жарыяланып, учурда издөө иштери жүрүп жатат", - деп билдиришти басма сөз кызматынан.