Бокс боюнча Дүйнө чемпиондугунда Медер Мамакеев биринчи беттеште утулуп калды

Беттеш жалпысынан тең өтүп, бирок Медерге караганда атаандашы физикалык жактан күчтүүрөөк келип, 1-болуп иштеп жатты

14-27-октябрь аралыгында Алматы шаарында өтүп жаткан бокс боюнча Дүйнө чемпиондугунда бүгүн, 60 жана 64 килограмм салмактагы боксчулар рингге чыгууда. Азыр кыргызстандык боксчу Медер Мамакеевдин (60 кг) катышуусундагы беттеш жыйынтыкталды. Тилекке каршы, Медер Мамакеев AIBAдин (Эл аралык бокс ассоциациясы) желеги астында чыккан Малик Викаш аттуу боксчуга жеңилип калды. Беттеш жалпысынан тең өтүп, бирок Медерге караганда атаандашы физикалык жактан күчтүүрөөк келип, 1-болуп иштеп жатты. Көп учурда күч салып сокку узаткан атаандашына караганда Медер техникага салып тыкан ойноду. Калыстардын чыгарган чечими талаш туудура турган десек болот. Анткени эч бир боксчунун айкын басымдуулугу болгон жок. Эми азыр дагы бир кыргызстандык мушкер Эрмек Сакеновдун (64 кг) ринг үстүнө чыгуусу күтүлүүдө.

Автор: Айбала Эргешов
Фото: AIBA