"Чет элдик ырларды жеткире аткарасың дешет" дейт "Гүлбадан", "Алма, алма" ырлары менен тойлордун көркүн ачкан Айтурган Эрмекова

Ырчы Айтурган Эрмекова "Кыз-Бурак" тобу аркылуу таанылган. Ал аталган топко 8-классында келгенин, кандай сабактарды алганын SUPER.KG порталына берген маегинде айтып берди.

"Топко келгенде жаш болчумун. Бизди анда Гүлшайыр Садыбакасова, Кенже Дүйшеева эжекелерибиз бардык нерсеге үйрөтчү, тагыраагы кантип маек бергенден тартып, нан, тамак бышырганга чейин. "Кыз-Бурак" тобу менен 5 жылга келишим түзгөм. Гүлшайыр Садыбакасова эже келишимдин мөөнөтү бүткөндөн кийин деле жеке ырчы болуп чыгышың керек, талантың бар деп дем берчү. Гүлшайыр эжекем азыркыга чейин дем берип, колдоп келет.

Көбү мени ырлары жок, чет элдик ырларды аткарып чыгат дешет. Менин репертуарымда ырларым бар, бирок ал ырларды угушпайт. Чет элдик ырларды которгон композицияларым жайылып, тойго барганда "Гүлбадан", Алма, алма" жана башка ырларды суранышат. Чет элдик ырларды жеткире ырдайсың дешет, мүмкүн ошондойдур. Миң долларга ыр жаздырып деле жеткире аткара албагандар бар да. Балким, чын эле ырларды жеткире аткарганым менен таанымал болуп жүрөм", - дейт ал.