"Чогуу сатабыз деп 68 тонна бензин алган". Бишкекте алдамчылыкка шектүү жаран кармалды

Бишкекте алдамчылыкка шектүү жаран кармалды. Бул тууралуу Октябрь РИИБинин басма сөз кызматынан билдиришти.

Маалыматка ылайык, 2019-жылы февраль айында Октябрь райондук милициясына шаар тургуну арыз менен кайрылган. Анда 2018-жылы февраль айында Туңгуч кичи районунда жайгашкан фирмалардын биринен күйүүчү майды чогуу сатабыз деп 68 тонна көлөмүндөгү бензинди ээлеп алып, убадасын аткарбай из жашырганын жазган. Келтирилген чыгым 2 миллион 500 миң сомду түзгөн.

Бул факты Кылмыштардын жана жоруктардын бирдиктүү реестрине "алдамчылык" беренеси менен катталып, сотко чейинки өндүрүш иши башталган.

Иликтөө иш-чараларынын натыйжасында, жогорудагы кылмыш ишине шектелип 49 жаштагы жаран кармалып, убактылуу кармоочу жайга киргизилген. Октябрь райондук соту анын баш коргоо чарасын карап, СИЗО-1ге эки айга камакка алынган. Учурда тергөө уланууда.

Автор: Гүлзина Каныбекова
Фото: Октябрь РИИБинин маалымат кызматы