"Барселона" клубу Лионель Мессинин клубдан кетиши менен 137 миллион евро жоготот

Аргентиналык атактуу футболчу Лионель Мессинин "Барселона" футболдук клубунан кетиши каталондук клубду 137 миллион евро зыянга учуратат. Бул тууралуу чет элдик спорттук басылмалар жазышты.

Маалыматка ылайык, "Барселона" клубу Лионель Мессинин кетиши менен демөөрчүлүк боюнча 77 миллион евро, футболкаларды жана башка товарларды сатууда 43 миллион евросун жоготот.

Буга чейин Лионель Месси 30-июнда келишими аяктаган "Барселона" клубунун кайра жаңы сунуштаган келишимине макул болгондугу, бирок бул келишим тууралуу расмий жарыялана электиги тууралуу маалымат чыккан. 6-августта клуб футолчу клубдан кетерин расмий жарыялаган.

34 жаштагы аргентиналык футболчу өзүнүн карьерасынын бардыгын, тагыраагы 17 жылын каталониялык клубда өткөргөн. "Барселона" менен Месси төрт жолу Чемпиондор Лигасын жеңип алган.

Автор: Азат Бейшенбеков