Жогорку Кеңештин төрагасы Талант Мамытов мушкер Рафаэль Физиевди кабыл алды

Жогорку Кеңештин төрагасы Талант Мамытов жакында эле жеңиш менен Бишкекке кайтып келген UFC мушкери Рафаэль Физиевди кабыл алды. Бул тууралуу төрага өзүнүн социалдык тармактагы баракчасы аркылуу билдирди.

Жолугушууда Талант Мамытов кыргыз мушкерин жеңиши менен куттуктап, ага Жогорку Кеңештин энчилүү кол саатын жана башка белектерди тапшырган.

"Бүгүн мекендешибиз, кыргыз мушкери Рафаэль Физиевди кабыл алып, Жогорку Кеңештин депутаттарынын жана жеке өзүмдүн атымдан кезектеги жеңиши менен куттуктадым. Рафаэль Физиевдин жеңиши Кыргыз өлкөсү үчүн чоң сыймык. Ушундай мекенибизди спорт менен даңазалаган эр-азаматтарыбыз көп болуп, мекенибиздин желеги ар дайым бийиктиктерде желбиресин", - деп жазып калтырган төрага Талант Мамытов.

Эске салсак, Рафаэль Физиев 8-августта UFC 265 турниринин алкагында америкалык мушкер Бобби Грин менен беттешип, аталган уюмдагы катары менен төртүнчү жеңишин камсыздаган. Ошондой эле ал беттешинен соң UFC уюмундагы Дастин Порье, Конор Макгрегор өңдүү атактуу мушкерлер орун алган эң мыкты 15 мушкердин катарына кирген.

Автор: Жанбулат Жумабеков