2-ноябрда бокс боюнча профессионалдар арасындагы Дүйнө чемпиону Геннадий Головкин менен Кёртис Стивенс беттешет

2-ноябрь күнү Нью-Йоркто орто салмактагы (72,5 килограмм) WBA (Дүйнөлүк бокс ассоциациясы) версиясы боюнча Дүйнө чемпиону, казакстандык Геннадий Головкин менен америкалык Кёртис Стивенс беттешет. Көпчүлүк бокс адистери беттеште казакстандык боксчу жеңишке жетерин божомолдоп жатышат. Буга жооп иретинде америкалык боксчу: “ММКлар мени рингге чыга электе эле жеңилгендей абалга түшүрүп жатышат. Бул адамдар кандай божомол кылып жатышканын билбейм, бирок 2-ноябрь күнү беттеш бүткөндө Головкин жеңет дегендин баары бармагын тиштеп, канча акча жоготконун эсептеп калат”, -дейт Кёртис Стивенс. Казакстандык боксчу болсо: “Кёртис оюна келгенди сүйлөй берет. Ал карьерасында атаандаштарын көп нокаутка түшүргөн, бирок ал башка деңгээлде болгон”,- дейт Геннадий Головкин. Профессионалдык рингде Геннадий Головкин 27 беттеш өткөрүп, баарында жеңүүчү аталган. Анын 24үндө нокаут менен жеңишке жетишкен. Ал Кёртис Стивенс болсо 25 беттештин 22синде жеңип, 3 ирет жеңилүү ызасын тарткан.

Автор: Айбала Эргешов