Казакстан, Өзбекстанда кандай? Интернет колдонуучулар Паралимпиададан келген спортчуларды тосуп алууга нааразы болду

Социалдык тармактардын колдонуучулары Токиодо өткөн Паралимпиада оюндарында өлкө намысын коргоп, мекенине кайтып келген кыргыз спортчуларын тосуп алуу иш-чарасы салкын маанайда уюштурулуп, көңүл кош мамиле жасалганына нааразы болушууда.

Анда Кыргыз өлкөсүн Паралимпиададан келген спортчуларын салтанаттуу түрдө тосуп алган коңшу Өзбекстан, Казакстан, ошондой эле Азербайжан өлкөлөрү менен салыштырышкан.

Белгилей кетсек, Япониянын Токио шаарында өткөн XVI Паралимпиадалык оюндар 24-августта башталып, 5-сентябрда жыйынтыкталган. Ага Кыргыз өлкөсүнүн атынан 2 спортчу, тактап айтканда пара дзюдочу Хайитхон Хусан кызы жана ядро түртүү боюнча чебер Арстанбек Базаркулов катышкан.

Тилекке каршы, Хайитхон Хусан кызы алгачкы беттешинде казакстандык спортчуга жеңилип, мелдештеги жүрүшүн жыйынтыктаган. Ал эми Арстанбек Базаркулов ядро түртүү боюнча мелдеште 10-орунду камсыздаган.

Кыргыз өлкөсүндөгү ден соолугунан мүмкүнчүлүгү чектелгендер арасындагы дзюдо федерациясы соцтармактагы расмий баракчасына Паралимпиададан кайтып келген Хайитхон Хусан кызын аталган федерациянын өкүлдөрүнөн башка эч ким тосуп албаганын жазып, сүрөт менен бөлүштү. Ошондой эле мындай кайдыгерликке салыштыруу иретинде коңшу өлкөлөрдөгү пара спортчуларды тосуп алуу иш-чарасында тартылган сүрөттөрдү жарыялады.

Өзбекстандагы Паралимпиададан келген спортчуларды тосуп алуу салтанаты:

Азербайжанда Паралимпиададан келген спортчуларды тосуп алуу салтанаты:

Кыргыз өлкөсүндө Паралимпиадага катышкан спортчуларды тосуп алуу иш-чарасы:

Хайитхон Хусан кызын ден соолугунан мүмкүнчүлүгү чектелгендер арасындагы дзюдо федерациясынын өкүлдөрү гана тосуп алган.

Ал эми Арстанбек Базаркуловду Спорт боюнча мамлекеттик агенттиктин директорунун орун басары, спорттун Олимпиадалык эмес түрлөрү боюнча дирекциянын директорунун орун басары жана жакындары тосуп алган.