Медербек Сыдыков Кыргыз футболдук союзунун президенти болуп шайланды

Бүгүн, 11-октябрда Бишкекте Кыргыз футболдук союзунун (КФС) кезексиз конгресси болуп өттү. Бул тууралуу SUPER.KG порталына футболдук союздун басма сөз кызматынан кабарлашты.

"Күн тартибине ылайык, Конгресс КФСтин азыркы президенти Канатбек Маматовдун мурда жарыяланган отставкасын кабыл алды.

КФСтин кезексиз конгрессинин күн тартибиндеги маселелердин бири жаңы президентти шайлоо болду. Бул кызматка катталган талапкерлер Семетей Султанов жана Медербек Сыдыков болгон.

Шайлоо Кыргыз футболдук союзунун уставына ылайык өттү. Медербек Сыдыков көпчүлүк добуш менен Кыргыз футболдук союзунун президенттигине 4 жылдык мөөнөткө шайланды", - деп билдиришти басма сөз кызматынан.

Эске сала кетсек, Кыргыз футбол союзунун мурдагы президенти Канатбек Маматов алдыда боло турган парламенттик шайлоого катышуу үчүн кызматтан кеткен. Ал бул кызматта 2019-жылдын бери иштеп келген.

Автор: Азат Бейшенбеков