Балбан Роман Сарыбаев ардагерлер арасындагы Дүйнө чемпиондугунда күмүш медаль жеңди

Кыргыз балбаны Роман Сарыбаев Грециянын Лутраки шаарында өтүп жаткан күрөш боюнча Дүйнө чемпиондугунда күмүш медаль жеңип алды.

Эркин күрөш боюнча 88 килограмм салмакта күч сынашкан ардагер балбаныбыз Дүйнө чемпиондугундагы алгачкы жүрүшүн өзбекстандык балбан Усмонжан Юсуповго каршы баштап, анда 9:2 эсеби менен жеңишке жетишкен.

Андан соң чейрек финалда казакстандык Абай Смагулов менен беттешип, 7:1 эсеп артыкчылыгында жеңип алган.

Ал эми жарым финалдык баскычта АКШнын спортчусу Жеймс Роберт Медейросту 7:1 менен уткан.

Бүгүн, 21-октябрь күнү финалдык беттешинде орусиялык балбан Булат Дашинимаев менен кез келип, тилекке каршы, 10:0 эсебинде жеңишти алдырып жиберди. Муну менен балбаныбыз Роман Сарыбаев ардагерлер арасындагы дүйнө чемпиондугунда күмүш медаль тагынды.

Белгилей кетсек, бул кыргыз курамасынын эсебиндеги төртүнчү медаль. Буга чейин ардагер балбандар Чынарбек Изабеков менен Талант Бегалиев алтын медаль утса, Сааданбек Ниязов коло байгеге ээ болгон.