Дүйнө чемпиондугу: Бекболот Мырзаназар уулу гвинеялык атаандашын 10:0 эсебинде жеңди

Бүгүн, 5-ноябрда Белград шаарында 23 жашка чейинкилер арасындагы күрөш боюнча Дүйнө чемпиондугунун төртүнчү күндүк беттештери Бишкек убактысы боюнча саат 15:30да уланды.

Дүйнө чемпиондугунда алгачкы жүрүшүн 1/8 финалда баштаган Бекболот Мырзаназар уулу гвинеялык Юна Фафе аттуу балбан менен кез келди.

Биринчи бөлүктө кыргыз балбаны атаандашынын артына өтүп, айлантып 9 упай алды. Экинчи бөлүк башталганда эле Бекболот Мырзаназар уулу атаандашын килемден түртүп чыгарып, бир упай алып, 10:0 эсебинде мөөнөтүнөн мурда жеңишке жетти.

Муну менен кыргыз балбаны Дүйнө чемпиондугунун чейрек финалына чыкты.

Бекболот Мырзаназар уулу Дүйнө чемпиондугуна 57 килограмм салмакта катышууда.

Автор: Азат Бейшенбеков