Ысык-Көлдө автокырсык катталып, 4 адам каза болду. Дагы үчөө жаракат алышты

Ысык-Көл облусунда 4 адамдын өмүрүн алган жол кырсыгы катталды. Жол кыймылынын коопсуздугун камсыздоо башкы башкармылыгынын маалыматында автокырсык бүгүн, 26-ноябрда саат 16:30да катталды.

Каракол-Эңилчек жолунда Ниссан Х-Трейл жана Субару Форестер унаалары сүзүшүп, анын кесепетинен 4 адам көз жумду.

"Ниссан Х-Трейл унаасынын дөңгөлөгү жайкы болгондуктан жолдон тайып, каршы тилкеге чыгып токтогон. Субару Форестер унаасынын 34 жаштагы айдоочусу токтогонго үлгүрбөй Ниссан Х-Трейл унаасын сүздү. Кырсыктын кесепетинен 4 киши каза болуп, дагы 3 адам денесинен ар кандай жаракаттарды алышты.

Каза болгондордун аты-жөнү такталууда", - дешти маалымат кызматынан.

Бул жол кырсыгы Кылмыштардын жана жоруктардын бирдиктүү реестрине катталып, тергөө жүрүүдө.

Автор: Бактыгүл Момбекова
Фото: Республикалык жол кыймылынын коопсуздугун камсыздоо башкы башкармалыгы