Нуржан Мелисбек уулу: "Беттешке декабрь айынан бери даярданып жатканбыз"

"Ынтымак" командасынын оюнчусу Нуржан Мелисбек уулу команданын жеңишинен кийин финалдык беттеш тууралуу пикирин билдирди.

"Биз бул оюнга декабрь айынан бери даярданып жатканбыз. Ошонун жыйынтыгы деп эсептейбиз. Буга чейин "Сары-Өзөндөн" коркуп жатканбыз. "Сары-Өзөн" чемпион болот деген коркунуч бар болчу. Бирок аракет кылдык. Жеңдик. "Сары-Өзөн" командасы менен акыркы жолу президенттин Кубогунда ушундай эле финалда беттешкенбиз. Анда 7:0 эсебинде жеңип алганбыз. Ал убакта "Сары-Өзөн" алсыз болчу. Ал эми быйыл аябай катуу даярдыкта келишиптир. Бирок биз да жакшы даярданып келгенбиз. Балдар акыркы секундга чейин оюн көрсөтүштү", - деди ал.

Белгилей кетсек, "Ынтымак" командасы бүгүн "Сары-Өзөндү" жеңип, Нооруз турниринде чемпион аталды. Финалдык беттеш 4:1 эсебинде "Ынтымактын" жеңиши менен аяктады.

Чолпон-Ата шаарында өтүп жаткан мелдеште Жогорку Лигадан сырткары Биринчи Лигада "Бакубат-Талас", ал эми ардагерлер арасында Чүй облусунун командасы жеңүүчү болду.

Автор: Жанбулат Жумабеков
Фото: Жанбулат Жумабеков