Чүй облусунда мыкаачылык менен киши өлтүрүү кылмышына шектелип 2 адам кармалды

Чүй РИИБи менен Чүй облустук ички иштер башкы башкармалыгынын иликтөөчү тобу тарабынан мыкаачылык менен киши өлтүрүү кылмышына шектүү адамдар кармалды. Бул тууралуу Чүй ОИИББинин басма сөз кызматы билдирди.

Маалыматка ылайык, 8-ноябрда саат 12:30дар чамасында милиция бөлүмүнө Совет айылынан адамдын сөөгү табылгандыгы тууралуу маалымат түшкөн. Иликтөөчү топ мыкаачылык менен өлтүрүлгөн жаран Ивановка айылынын 37 жаштагы тургуну экенин аныкташкан.

Аталган факты боюнча Кылмыш-жаза кодексинин 97-беренесине (адам өлтүрүү) ылайык кылмыш иши козголгон.

Тергөөнүн жүрүшүндө Чүй районунун 21 жаштагы жашоочусу жана Жайыл районунун 24 жаштагы жашоочусу кармалып, убактылуу кармоочу жайга жеткирилди.

Соттук-медициналык экспертиза дайындалып, иликтөө иштери жүрүүдө.

Автор: Айпери Ганыжан кызы