Бишкек ШИИББи: “Көлбаевдин уюшкан кылмыштуу тобунун мүчөсү кармалды”

Борбордогу Биринчи Май РИИБинин кызматкерлери Бишкек шаарындагы Тыныстанов көчөсүнөн Камчы Көлбаевдин уюшкан кылмыштуу тобунун мүчөсү, 36 жаштагы К.Э. аттуу адамды кармашты. Бул тууралуу 28-ноябрда Бишкек ШИИББинин басма сөз кызматы билдирди.

Милиция кызматкерлери тарабынан кармалган адамга таандык Гольф-4 унаасын текшерүүдө айдоочунун отургучунун алдынан белгисиз үлгүдөгү кара түстөгү тапанча, 2 огу бар ок салгыч табылды.

Ыкчам-иликтөө тобунун кызматкерлери тапанчаны ИИМдин эксперттик-криминалдык борборуна өткөрүп берип, курал 5.6 калибрлүү «Марголин» үлгүсүндөгү, номуру сүрүлгөн аскердик тапанча экени аныкталды.

Аталган факты боюнча Кыргыз Республикасынын Кылмыш-жаза кодексинин 241-беренесине (курал-жарактарды мыйзамсыз кармоо) ылайык кылмыш иши козголду. Кармалган К.Э. Бишкек ШИИББинин убактылуу кармоочу жайына жеткирилди.

Автор: Айпери Ганыжан кызы