Көк бөрү Баткен: Белек Мукаевдин Көк бөрү мектеби Биринчи лиганын финалына чыкты

"Көк бөрү мектеби" командасы Улуу жеңишке карата Баткен облусунун Кадамжай районунда өтүп жаткан көк бөрү турниринин финалына чыкты. Алар жарым финалдык баскычта Талас облусунун "Бакай-Ата Дөөлөт" командасын жеңип алды. Эки команда беттештин негизги убактысында 2:2 эсебинде тең чыгышты. Анда "Көк бөрү мектебинен" 2 салымды тең Сапарали Теңизбек уулу таштаса, "Бакай-Ата Дөөлөт" командасынан да Тагдыр Турдубаев 2 ирет өзгөчөлөндү.

Андан соң оюн калысы финалга чыга турган команданы аныктоо үчүн буллиттер сериясын белгиледи. Анда "Көк бөрү мектебинин" 3 оюнчусу тең, тагыраагы Тилек Мусабеков, Болотбек Калыбеков жана Эшмурат Эшмуратовдор салымды ийгиликтүү ишке ашырышты. Ал эми "Бакай-Ата Дөөлөт" командасынан Тагдыр Турдубаев алгачкы улакты таштаганы менен Кенжебек Коёшев жана Мырза Жамгырчы уулу катага жол берди. Жыйынтыгында эсеп сандары 3:1 болуп, "Көк бөрү мектеби" финалга жолдомо алды.

Эми алар финалдык баскычта Ош облусунун "Алай" командасы менен кез келет. "Алай" жарым финалда "Өзгөн" командасын 6:1 эсебинде утуп алган.

Белгилей кетсек "Көк бөрү мектеби" быйыл Нооруз майрамына арналган Чолпон-Ата шаарындагы турнирде алгачкы жолу түзүлүп чыгып, оюн көрсөткөн. Команданын жетекчиси жана машыктыруучусу белгилүү көк бөрүчү Белек Мукаев.

Автор: Жанбулат Жумабеков