Бишкекте таанышын алдап, унаасын алып изин жашырып кеткен жаран кармалды

Бишкек шаарынын Ленин райондук ички иштер башкармалыгынын ыкчам кызматкерлери алдамчылыкка шектелген жаранды кармашты. Бул тууралуу Ленин РИИБинен билдиришти.

Маалыматка ылайык, милицияга 11-май күнү А.Т. аттуу жаран кайрылган. Анда ал Д. аттуу чала таанышы акчасын бир айдын ичинде төлөп берем деп убада берип, баасы 38 миң долларды түзгөн Mercеdes-Benz S-500 4MATIC үлгүсүндөгү унаасын ээлеп алып, андан кийин бул унааны үчүнчү жактарга сатып, качып кеткендигин билдирген.

Бул факты боюнча "алдамчылык" беренеси менен кылмыш иши козголгон. Жүргүзүлгөн ыкчам иликтөө иш-чараларынын жүрүшүндө, кылмышка шектүү катары 1959-жылы туулган М.Д. аттуу жаран кармалды.

Учурда шектүүнүн ушул сыяктуу башка кылмыштарга катыштыгы бар же жок экендигин аныктоо боюнча тергөө амалдары жана ыкчам иш-чаралар жүргүзүлүүдө.

Эгерде сүрөттөгү жарандан жабыр тарткандар болсо, кабар берип коюуну милиция кызматкерлери өтүнөт. Байланыш номерлери: 0(312) 352-947, 0 (312) 654-494, 0(555) 102-149, 0(502) 149-149, 0(508) 384-242 же 102.

Автор: Айзада Кыдырмышева