“Бавариянын” жарым коргоочусу Арьен Роббен жаракатынан улам жыл соңуна чейин ойнобойт

Мюнхендик “Бавариянын” жана Голландия курама командасынын жарым коргоочусу Арьен Роббен тизесинен алган жаракатынан улам жылдын аягына чейин ойнобойт. Бул тууралуу бүгүн, 5-декабрда германиялык басылмалар билдирди.

Маалыматка ылайык, Роббен жаракатынан кем дегенде 4 аптада айыгат. Демек, УЕФАнын Чемпиондор лигасынын 6-тур оюнуна, Германиянын чемпиондугунун 4 оюнуна жана Мароккодо өтө турган клубдар аралык Дүйнө чемпиондугуна катыша албайт.

Эске салсак, голландиялык футболчу Германиянын кубогунун чейрек финалында “Аугсбург” менен болгон оюнда жаракат алган. Оюн 2:0 эсебинде аяктап, анын бир голун футболчу өз эсебине жазган.

Автор: Максат Кудайбердиев