Маркумдун сөөгү дүкөндүн жанынан табылган. Бишкек милициясы шектүүнү кармады

Бишкекте адамдын ден соолугуна оор залака келтирүүгө шектүү жаран кармалды. Бул тууралуу Ленин РИИБи тарабынан маалымдалды.

Маалыматка ылайык, милиция кызматына 29-сентябрда саат 7:43 чамасында Интергельпо жана Дмитров көчөлөрүнүн кесилишинде жайгашкан азык-түлүк дүкөндүн жанынан болжол менен 40-45 жаштар чамасындагы адамдын жансыз денеси табылганы тууралуу билдирүү түшкөн.

Жерине Ленин РИИБинин тергөө-ыкчам тобу барып, денесинен жаракат алган адамдын жансыз денесин табышкан. Ошондой эле маркумдун аты-жөнү такталып, ал 51 жаштагы Р.Н. аттуу жаран экени аныкталган.

Аталган факты Кылмыштардын жана жоруктардын бирдиктүү реестрине катталып, 130-берене (денеге оор залал келтирүү) менен кылмыш иши козголгон. Тиешелүү экспертизалар дайындалды.

6-октябрда кылмышка шектүү катары 40 жаштагы Т.У. аттуу жаран кармалып, убактылуу кармоочу жайына киргизилди. Учурда тергөө иштери уланууда.

Автор: Айжанар Рыспек кызы
Фото: Ленин РИИБи