SUPER.KG порталынын Поэтерапия рубрикасында жаш акын Сыймык Райымбердиев ырларынын таржымалы тууралуу баяндап берди.
Сыймык Райымбердиев 1999-жылы 20-июлда Жалал-Абад облусуна караштуу Базар-Коргон районунун Баймундуз айылында жарык дүйнөгө келген. 2020-жылы Кыргыз-Түрк Манас университетин аяктап, андан соң Исхак Раззаков атындагы Кыргыз мамлекеттик техникалык университетинин Транспорт жана механикалык инженерия факультетине тапшырган. Азыр аралыктан билим алып жаткан учуру.
2021-жылы интеллектуалдык менчик мамлекеттик фонду тарабынан басылып чыккан "Саамалык-16" китебинде бир канча ырлары жарык көргөн. Учурда жеке ыр жыйнак китебин чыгаруу аракетинде жүрөт. Бир канча ырларына обон жазылган. Учурда чет өлкөдө эмгектенет.
АПАМА
Жолуна түшүп, чоң турмуш деген жарыштын,
Мен үчүн далай кайгырып жашың тамыздың.
Ыңаалап ыйлап, уурдаган үчүн уйкуңду,
Ырасын айтсам далай түн сизге карызмын.
Жакшы сөз айтсаң, кээ күнү укпай эсирдим,
Жаш экем көрсө, анымды апа кечиргин.
Билинбей такыр, мезгилдин учуп өткөнү,
Байкабаптырмын, басканын бырыш бетиңдин.
Мезгилдер тынбай, кол салып улам жашыңа,
Мени деп канча, көп түйшүк түштү башыңа.
Ааламдын бүткүл, байлыгын топтоп келсем да,
Арзыбайт билем, ак түшкөн бир тал чачыңа.
2021-жылы Москва шаарында эмгектенип жүргөн кезим. 27-сентябрь апамдын туулган күнү болуп, телефон аркылуу байланышып, 47 жаш кутман курагы менен куттуктадым. Жашоонун мыйзамына байланыштуу убакыттын өтүшү менен биз чоңойгон сайын ата-энелерибиздин жашы өтүп бара берет экен. А мен болсо апамдын жаш боюнча калуусун каалайт элем. Бала кезде аябай шок болчумун. Апамдын айткандарын аткарбай, кыскасы апамды көп түйшүккө салгам. Ошол күндөрүмдү эстеп алып, апамдан кечирим суроо иретинде жана апамды канчалык жакшы көрөрүмдү билдириш үчүн бул ырды жазгам.
Апаларыбызды убагында сыйлап, кадырына жетели. Менин эң алгачкы жазган ырым да өзүмдүн апама арналган. Негизи эле энелердин эмгеги тоодой бийик, суудай тунук эмесби. Канча ыр жазып, даңазаласак да аздык кылат. Энелерибиз ар дайым аман болсун.
ЖАЛГЫЗДЫК ЖОЛУ
Жалгыз жүрүп, жолдорунда армандын,
Сен кеткен соң, мен өзгөрүп калганмын.
Жүрөк сырын, бир да пенде түшүнбөй,
Жалгыздыкты жолдош кылып алганмын.
Жетеленип санаасына көп ойдун,
Жалгыздыктын талаасына жөнөймүн.
Көңүл чиркин, ызы-чууну жактырбай,
Көпчүлүктүн калаасына өгөймүн!
Билесиңби, бүгүн кайда келгеним?
Биз экөөбүз бирге жүргөн жердемин.
Жүрөгүмө сен да жакпай тек гана,
Жалгыздыкты каалап турган кездемин!
Жетеленип жолдорунда армандын,
Жалгыздыкты жолдош кылып алганмын!
ТААРЫНБА
Сени эстеп өткөрсөм да ай-жылымды,
Мерез деп күнөөлөбөйм тагдырымды.
Болгону сага болгон сезимдерим,
Бактылуу өмүрүмдү жарды кылды.
Кармашпай кайра биздин колдорубуз,
Кезикпей калса дагы жолдорубуз.
Анда ыраазымын тагдырыма,
Арга жок бир пендебиз болгону биз.
Кокустук болбосо эле капилеттен,
Кетирбейм сени такыр акыл-эстен.
Дүйнөдө жоолуга албай калсак эгер,
Кез келип жоолугарбыз акыреттен.
Ойнотуп салып алып алкымына,
Куу турмуш эки жолду жазды мына.
Таарынбайм бул өмүрдүн аздыгына,
Таарынба сен да жазган тагдырыңа.
2018-жыл. Жаңылышпасам күз мезгили болчу. Студент кезде бир сулуу менен таанышып, бир топ жыл сүйлөшүп жүрдүк. Бул жашоодо ар дайым эле адам ойлогондой боло бербейт экен. Кийин тагдырдын буйругу менен эки башка жолго түшүп кеттик. Ошондон улам, ал кыз менен коштошуу иретинде жазылган ырым. Бешенеге жазылбаган адам менен канча аракет кылсаң да бирге боло албайт экенсиң. Жашообузда болуп жаткан ар бир иштин аркасында бир жакшылык бар эмеспи. Андыктан жашоого таарыныч болбосун деген сыяктуу жазылган ыр.
ЖЕҢИЛБЕС КУРАЛ
Кол салса душман кыргызга,
Бир курал ойлоп тапсам не.
Чабуулга чыгып кыр-кырда,
Чекеден кырып атсам не!
Согушсаң колоң-коктуда,
Өткөрбөй турган окту да,
Мекен деп соккон жүрөктөн,
Күчтүүрөөк курал жок тура.
Душманды кууп артына,
Тынч жашоо сунган калкына.
Кыргыздын ар бир уулунда,
Жеңилбес курал бар тура!
Бул ырым акыркы Кыргыз-Тажик чек арасындагы кагылышуу учурунда жазылды. Кыргыз жоокерлерине аздыр-көптүр дем берип, кыргыздын эр-жүрөк уулдарынын көрсөткөн кызматына ыраазычылык билдирүү иретинде жаздым. Чынында эле кыргыз жоокерлери жеңилбес, тайманбас, эр-жүрөк экенин дагы бир жолу далилдешти. Кыргыз элибизде ар дайым тынчтык жана бейпилдик болсун.
ӨМҮР ШАШАТ
Мөлтүр суудай токтобостон агасың,
Эх өмүрүм кайда шашып барасың?
Жакындатат ар бир сенин агышың,
Жашоо менен кабырымдын арасын,
Жаркылдаган жаштыгыма асылбай,
Жайлаш өмүр, токтой турчу шашылбай.
Көз ирмемде бала чакты бүтүрдүң,
Он гүлүмдөн али бир гүл ачылбай.
Ансыз деле калтырбастан аргамды,
Айлар өтүп арбын жылдар айланды.
Тирүүлүктө жасай турган ишим көп,
Токто өмүр, шашылбачы, жайланчы!
АЙЫКПАС ДАРТ
Сендик ой мага жалгаса нечен,
Санаалар менен кармаша кетем.
Сезимдер кыйнап,
Сездирбей ыйлап,
Сыркоолуу болуп калбасам экен.
Уктаарда жатып, ойлоном эчен,
Уктасам чоочуп, ойгоно кетем.
Онтолоп жетпей,
Оюмдан кетпей,
Оорукчан кылып койбосоң экен.
Басылсам эгер, жүк толуп желкем,
Бакырып алам, бук болуп эркем.
Карайлап шордуу,
Калбасам болду,
Айыкпас дартка туш болуп эртең!
