Токтогул милициясы опузалап акча талап кылууга шектүү катары уюшкан кылмыштуу топтун мүчөсүн кармады

Токтогул милициясы опузалап акча талап кылууга шектүү катары уюшкан кылмыштуу топтун мүчөсүн кармады. Бул тууралуу Жалал-Абад облустук милициясынан билдиришти.

Маалымдалгандай, 8-январь күнү 28 жаштагы тургун милицияга арыз менен кайрылган. Арызында 31-декабрь күнү саат 14:30 чамасында Токтогул шаарынын борбордук базарында соода кылып жаткан дүкөнүнө бейтааныш болгон 25-30 жаштардагы бала келип, эч бир себепсиз коркутуп, опузалап 5000 сом акча талап кылганын билдирген.

Андан кийин ушул жылдын 8-январь күнү саат 15:00 чамасында Токтогул шаарында өзүнүн жеӊил унаасында кетип бара жатканда Хонда Фит үлгүсүндөгү унаада опузалап талап кылган бала 2 бейтааныш шериктери менен келип токтотуп, автоунаасына салып кетишкен. Алар Токтогул районундагы каналдын жанына алып барып, оозго алгыс уят сөздөр менен сөгүп, уруп-тепкилеп, денесине жаракат келтиргенин билдирген.

Бул факты каттоого алынып, кылмыш иши козголгон. Жабырлануучунун денесинен алган жарааттарын аныктоо максатында соттук-медициналык экспертиза дайындалган.

Окуяга шектүү катары уюшкан кылмыштуу топтун мүчөсү, Токтогул районунун тургуну 1995-жылы туулган М.Н. аттуу жаран кармалып, убактылуу кармоочу жайга киргизилген.

Ал эми дагы бир Токтогул районунун 1995-жылы туулган А.Н. аттуу тургуну кармалып, тергөөгө камсыздалган.

Азыркы учурда тергөө амалдары жүрүүдө.

Автор: Максуда Кудайбердиева