Муз үстүндө бийлөө боюнча кыргызстандык жаш спортчулар Орусияда өткөн "Династия кубогунда" 5 медаль утушту

Муз үстүндө бийлөө боюнча Кыргызстан жаштар курама командасы Орусияда өткөн Эл аралык мелдеште 5 медаль утушту. Бул тууралуу аталган спорт түрү боюнча федерациядан билдиришти.

Маалыматка ылайык, Орусиянын Санкт-Петербург шаарында өткөн “Династия кубогу” мелдешине Орусиядан, Финляндиядан, Кыргызстандан жана Прибалтика өлкөлөрүнөн 350 жаш спортчулар катышкан.

Кыргызстандын желеги астында барган 7 спортчунун ичинен 5и байгелүү орундарга илиништи. Алтын медаль Кубат Жүндүбаевге, Милан Мамбеталиевге жана Диера Насирхановага буюрса, Алекс Нам күмүш ээси болду. Жалгыз коло медаль Данил Светличныйдын энчисине жазылды.

Автор: Максат Кудайбердиев