Таласта мамлекетке 30 миллион сом зыян келтирүүгө шектелген чиновниктер үй камагына чыгарылды

Таласта мамлекетке 30 миллион сом зыян келтирүүгө шектелген чиновниктер үй камагына чыгарылды. Бул тууралуу УКМКнын маалымат кызматынан билдиришти.

Маалымдалгандай, Коррупцияга шектелип кармалган Талас шаарынын вице-мэри менен Талас шаардык кеңешинин кызматкерлери мамлекеттик бюджетке 5 миллион сом кайтарып беришкен. Мындан сырткары келтирилген зыяндын калган бөлүгүн төлөп берүүгө милдеттендирилген.

Буга чейин Талас шаарынын биринчи вице-мэри Б.М., Талас шаардык кеңешинин төрагасы Ж.А., вице-спикер К.А. жана муниципалдык менчик башкармалыгынын жетекчиси Д.М. кармалгандыгы маалымдалган.

Атайын кызмат алар Талас шаарында муниципалдык менчикте турган жер тилкелерин ижарага берүүдө коррупциялык схема түзгөнүн билдирген Ошол эле учурда 2020-2022-жылдар аралыгында мамлекеттик бюджетке 30 миллион сомдон ашык зыян келтирүүгө айыпталып жатканын аткан.

Талас шаардык соту айыпталуучулардын баш коргоо чарасын өзгөртүп, үй камагына чыгаруу чечимин кабыл алган.

Автор: Максуда Кудайбердиева