"Террористтик топтун мүчөсү болгон". Кыргызстандын чек арасынан мыйзамсыз өткөн жаран кармалды

Кыргызстандын чек арасын мыйзамсыз кесип өткөн деген шек менен чет өлкөлүк 1982-жылы туулган М.И.М. аттуу жаран кармалды. Бул тууралуу бүгүн, 11-мартта УКМКнын маалымат кызматынан билдирди.

Маалыматка ылайык, кармалган жаран Орусиянын аймагындагы жашыруун террористтик топтун активдүү мүчөсү болгон.

"Ыкчам-иликтөө иш-чараларынын жүрүшүндө М.И.М. 2022-жылдын октябрында Кыргызстандын аймагына мыйзамсыз өтүп келгендиги такталган. Кармалган жаран жасалма паспорт алып, андан кийин Сириядагы куралдуу кагылыш болгон аймакка барууну пландаганы аныкталды", - деп айтылат маалыматта.

Азыркы учурда УКМК тарабынан М.И.М.нын Кыргызстандын аймагындагы шериктерин аныктоого жана кармоого багытталган зарыл болгон тергөө иш-чаралары жүргүзүлүп жатканы кошумчаланды.

Автор: Бек Оморбеков
Фото: УКМКнын маалымат кызматы