Акжол Махмудовдун Алматыдагы беттеши: Жоламан дагы килемге чыкмай болду

26-апрелде Алматы шаарында өтө турган "Поддубный лигасынын" алкагында кыргыз балбаны Жоламан Шаршенбеков дагестандык Динислам Бамматов менен күрөшөт.

Эки балбан күрөштүн грек-рим түрү боюнча 60 килограмм салмак ченинде кез келишет.

Эскерте кетсек, Жоламан Шаршенбеков 60 килограмм салмакта "Поддубный лигасынын" учурдагы чемпиону.

Динислам Бамматов 2021-жылы жаштар арасында Дүйнө чемпиону болгон. Ошондой эле ал февраль айында өткөн Орусия чемпиондугунда жеңүүчү болгон.

Белгилей кетсек, ушул эле турнирде атактуу орусиялык балбан Роман Власов менен "Токио-2020" жайкы Олимпиада оюндарынын күмүш байге ээси, Дүйнөнүн учурдагы чемпиону Акжол Махмудов кез келет.

Мындан тышкары, кыргыз балбаны Тайырбек Жумашбек уулу орусиялык балбан Абасгаджи Магомедов менен күрөшөт.

Автор: Азат Бейшенбеков