Таластагы мал уурулукка шектүү жаран Токтогулдан кармалды

Таластагы мал уурулукка шектүү жаран Токтогул районунан кармалды. Бул тууралуу Талас облустук милициясынын маалымат кызматынан билдиришти.

Маалымдалгандай, ушул жылдын 1-апрель күнү Талас шаарынын Д.Д. аттуу тургуну милицияга арыз менен кайрылган. Анда үйүнүн короосунан 1 баш уюн белгисиз жарандар уурдап кеткендигин билдирген.

Аталган факты каттоого алынып, тергөөгө чейинки текшерүү иши башталган. Анын негизинде уурдалган уй Жалал-Абад облусуна караштуу Токтогул райондук мал базарда аныкталып, Жалал-Абад ОИИБдин кызматкерлери менен бирдикте кылмышка шектүү кармалган. Ал мал базардан уйду 35 000 сомго баалап сатып жаткандыгы такталып, ошол учурда кармалган.

Кармалган шектүү Талас шаарынын 20 жаштагы У. Д. аттуу тургуну экендиги аныкталды.

Ал Талас шаарына алынып келинип, убактылуу кармоочу жайга киргизилди. Тергөө амалдары жүрүп жатат.

Автор: Максуда Кудайбердиева
Фото: Талас ОИИБ