Бишкекте курулуп жаткан үйдөн 15 жаштагы кыздын сөөгү табылды

Бишкек шаарындагы Токомбаев көчөсүндөгү курулуп жаткан көп кабаттуу үйдөн 15 жаштагы өспүрүм кыздын жансыз денеси табылды. Бул тууралуу Октябрь райондук ички иштер бөлүмүнөн билдиришти.

Маалыматка ылайык, 8-май күнү саат 09:00дө шаардык милицияга А.Токомбаев көчөсүндөгү курулуп жаткан көп кабаттуу үйдүн аймагынан кыздын жансыз денеси табылгандыгы тууралуу маалымат түшкөн. Ал жерге барган милиция кызматкерлери жансыз денеси табылган кыз 2008-жылы туулган М.А. экенин аныктаган.

Маркумдун денесинен эч кандай жаракат табылган эмес. Бул факты катталып, тергөөгө чейинки текшерүү иштери жүргүзүлүп, өлүмдүн себебин аныктоо үчүн соттук-медициналык экспертиза дайындалды.

Бул боюнча Чүй облустук ички иштер башкармалыгы дагы кошумча маалымат таратты. Анда облустук милицияга балдар үйүнүн социалдык педагогоу А.Р. аттуу жаран кайрылган. Арызында ал 6-май күнү 2008-жылы туулган М.А.Х. аттуу кыз мектептен чыгып кеткен бойдон дайынсыз болуп жатканын билдирген.

Бул факты электрондук журналга катталып, териштирүү ошол эле күнү башталган болчу.

Автор: Азат Бейшенбеков