Балбан Калыбек Жолчубеков Казакстандын президентинин Кубогунда алтын медаль тагынды

Кыргызстандык балбан Калыбек Жолчубеков Казакстандын президентинин Кубогу үчүн өтүп жаткан Эл аралык мелдеште алтын медаль тагынды. Бул тууралуу казакстандык басылмалар билдиришет.

Маалыматка ылайык, Калыбек Жолчубеков 55 килограмм салмакта 3 беттешин утуп, чемпиондукту камсыздай алды.

Казакстандын президентинин Кубогу үчүн болгон мелдеш 11-декабрда старт алган жана ага дүйнөнүн 9 өлкөсүнөн жүзгө чукул балбан катышууда. Чемпиондук үчүн күрөштөр 7 салмак категориясында жүрүүдө.

Бул жолкусун эске алганда мелдеш 4-ирет өткөрүлүп жатат. Анын байге фонду 77 000 долларды түзөт. Алтын алган балбанга 5000 доллар каралса, күмүш ээсине 3000 доллар ыйгарылат. Ал эми коло медалдын ээлери 1500 доллар менен сыйланат.

Автор: Максат Кудайбердиев