Алимардон Шүкүров "Неман" клубу менен УЕФАда экинчи ирет жеңишке жетти

Кыргыз футболчусу Алимардон Шүкүров "Неман" клубу менен биргеликте УЕФА Конференция Лигасында экинчи жеңишин камсыздады. Бул тууралуу чет элдик спорт басылмалары жазды.

"Неман" (Беларусь) кечээ, 27-июлга караган түнү Еврокубоктун квалификациялык баскычынын 2-раундунда "Бальцан" клубу (Мальта) менен кез келди. Беттеш 2-0 эсебинде беларустук команданын жеңиши менен аяктады. Алимардон Шүкүров талаага негизги курамда чыгып, 90 мүнөт бою оюн көрсөттү.

Эки команданын жооптук беттеши 2-август күнү Мальтада өтөт.

Алимардон Шүкүров буга чейин ушул эле лиганын алкагындагы "Вадуц" клубу менен болгон беттеште 82-мүнөттө чечүүчү голду жараткан. Анын голунан кийин "Неман" жеңишти камсыздап, керектүү упайга ээ болгон.

23 жаштагы футболчу аталган клубда 2021-жылдан бери оюн алып барып келет. Ал ошол эле жылы Кыргызстанда "Жылдын мыкты футболчусу" наамын жеңип алган.

Автор: Жанбулат Жумабеков
Фото: Интернеттен алынды