Министрлик: "Мамлекеттик дарыканадан дарыны 10-15 пайызга арзан алса болот"

Бишкекте “Эл аман” аталышындагы биринчи мамлекеттик дарыкана ачылып, ага министр Алымкадыр Бейшеналиев катышты. Бул тууралуу Саламаттык сактоо министрлигинен билдиришти.

Маалыматка ылайык, Бейшеналиев мамлекеттик дарыканалардын ачылышы элди жеткиликтүү дары-дармек менен камсыздоо көйгөйүн чече аларын айткан.

"Дарыкана Логвиненко, 30 дарегиндеги №3 үй-бүлөлүк медицина борборунда жайгашкан. Саламаттык сактоо министрлиги ал жакта 800 аталыштагы зарыл болгон препараттар бар экенин билдирди.

Жашоочулар мамлекеттик дарыканадан дарыны 10-15 пайызга арзан ала алат”, - деп билдиришти мекемеден.

Ошондой эле министрлик 10-ноябрга чейин республика боюнча 46 мамлекеттик дарыкана ачыларын белгиледи. Ал эми дарылардын түрүн 2 миңге чейин көбөйтүү каралып жатканын баса белгиледи.

Бишкекте - 10, Ош шаарында - 3, Ош облусунда - 5, Талас облусу боюнча - 3, Чүйдө - 7, Ысык-Көл олусунда - 4, Нарын облусунда - 3, Жалал-Абад облусунда - 5, Баткенде - 6 мамлекеттик дарыкана ачылары күтүлүүдө.