Ош шаарында көмүрдүн бир тоннасы 6500 сомдон сатылууда

Ош шаарында сатылып жаткан көмүрдүн баасына мониторинг жүргүзүлүүдө. Бул тууралуу калаа мэриясынан билдиришти.

Белгилүү болгондой, мэриянын кызматкерлери Мамыров көчөсүндөгү жана Ак-Тилек кичи районундагы көмүр сатылып жаткан жайлардагы кара отундун бааларын текшерип, сатуучулар арасында түшүндүрүү иштери өткөзүштү.

Азыркы тапта Ош шаарында көмүргө болгон баа туруктуу экендиги айтылды.

Белгилей кетсек, 25-октябрдан тарта ата мекендик көмүрдүн бирдиктүү баасы (90 календардык күнгө) белгиленген. Ага ылыйык, кара отундун баасы тоннасына 6 500 сомдон, чекене баасы 1 килограммга 7 сомдон ашпоо керек.

Монополияга каршы жөнгө салуу кызматы тарабынан мыйзам бузуулар аныкталган учурда, колдонуудагы мыйзамдардын алкагында тиешелүү чаралар көрүлөт.

Автор: Максуда Кудайбердиева
Фото: Ош шаарынын мэриясы