Министрлик таштандыдан табылган ымыркайдын абалы тууралуу үн катты

Бүгүн, 9-ноябрда Саламаттыкты сактоо министрлиги таштанды челектен табылган ымыркайдын абалы тууралуу маалымат берди.

Маалыматта 8-октябрда саат 23:38де Бишкектеги №1 төрөт үйүнө апасы жок жаңы төрөлгөн ымыркай жеткирилгени айтылат.

"Эркек баланын салмагы 2210 граммды түзгөн. Ал убагына жетип эле төрөлгөнү менен салмагы аз болгон", - дешти министрликтен.

Кошумчалангандай, баланын белгисиз шартта төрөлүшү, катуу гипотермиядан (температуранын 28,4 градуска чейин төмөндөшүнөн) абалы оор.

"Жандандыруу бөлүмүндө балага дароо бардык керектүү медициналык жардам көрсөтүлдү: кароо, жылытуу, инфузиондук терапия.

Бүгүнкү күндө дарыгерлер баланын абалын туруктуу деп баалашууда, кычкылтексиз, формула менен тамактандырып, инкубатордо, дарыланып жатат. Балага бардык оптималдуу шарттар түзүлүп, байкоо уланууда”, – деп айтылат билдирүүдө.

Эскерте кетсек, буга чейин Бишкектеги таштанды челектердин биринен ымыркай бала табылганын SUPER.KG порталына Октябрь райондук ички иштер бөлүмүнөн билдиришкен болчу.

Автор: Максуда Кудайбердиева