Нурдан Орунтаев Ысык-Көлдөгү мектептердин курулуш иштери менен таанышты

Ысык-Көл облусу боюнча Мамкурулуш тарабынан 7 мектеп пайдаланууга берилди, дагы 5 мектептин курулушу 15-декабрга чейин бүткөрүлөт. Бул тууралуу бүгүн, 20-ноябрда Архитектура, курулуш жана турак жай-коммуналдык чарба мамлекеттик агенттигинен билдиришти.

Маалыматка караганда, Мамкурулуштун жетекчиси Нурдан Орунтаев Ысык-Көл облусундагы мектептердин жана бала бакчалардын курулушунун жүрүшү менен таанышты. Бүгүнкү күнгө карата Мамкурулуш облус боюнча 7 мектепти пайдаланууга берди, дагы 5 мектептин курулуш иштери үстүбүздөгү жылдын 15-декабрына чейин бүткөрүлөт.

"Текшерүүнүн жүрүшүндө Мамкурулуштун кызматкерлерине мектеп жана бала бакчалардын курулушун өз мөөнөтүндө бүткөрүү боюнча тапшырмалар берилди.

Мындан сырткары, Нурдан Орунтаев курулушта пайдаланылган материалдардын сапатына, бекитилген дол-боордук-сметалык документацияга ылайык келишине өзгөчө көңүл бурууга чакырды",- деп айтылат маалыматта.

Эскерте кетсек, мектептер менен бала бакчалардын курулушу президенти Садыр Жапаровдун жыл аягына чейин 100 мектепти бүтүрүү жөнүндөгү тапшырмасына ылайык республикалык бюджеттин эсебинен жүрүп жатат.

Автор: Айзада Кыдырмышева