Кыргыз-казак чек арасындагы “Ак-Тилек” постунда 500дөн ашык унаа кезекте турат

Жүк ташуунун агымы көбөйгөндүгүнө байланыштуу кыргыз-казак чек арасындагы “Ак-Тилек-автожол” өткөрүү жайында транспорт каражаттарынын жана жүктөрдүн топтолуусу байкалууда. Бул тууралуу бүгүн, 21-ноябрда Чек ара кызматынан билдиришти.

Маалымдалгандай, ушул сааттарга карата “Ак-Тилек-автожол” өткөрмө пунктунда 510 жүк ташуучу унаа кезек күтүп турат.

"Өткөн суткада кыргыз-казак мамлекеттик чек ара тилкесин 555 транспорт каражаты кесип өткөн, анын ичинен Кыргызстандан Казахстанга 273 автоунаа чыгып, 282 унаа кирген", - деп айтылат билдирүүдө.

Кошумчалангандай, жүк ташуучу транспорт каражаттарына эч кандай чектөөлөр жок. Эки өлкөнүн мамлекеттик чек ара тилкесиндеги бардык өткөрүү жайлары штаттык режимде иштеп жатат.

Автор: Максуда Кудайбердиева